गोदापात्रातील माफियांचे ‘कल्याण’ करणाऱ्यामुळे ठाणेदारांवर नियंत्रण
गेवराई, दि. 3 (वार्ताहार) गेवराई पोलीस ठाण्याच्या हद्दीत नेहमीच वाळू तस्करी हा चर्चेचा विषय ठरला असून, लाचखोरी आणि या अवैध तस्करीमुळे अनेकांचे ‘कल्याण’ करणाऱ्या कर्मचाऱ्यामुळे थेट ठाणेदारांवर नियंत्रणाला जाण्याची वेळ आली आहे. नूतन ठाणेदार बुद्धिराज सुकाळे यांच्यासमोर देखील या ‘कल्याणा’ला आवर घालण्याचे आव्हान असणार आहे.
दोन कर्मचाऱ्यांवर लाच प्रकरणी कारवाई झाल्यानंतर अपेक्षेप्रमाणे आपली चौकशी होईल अशी आशा ठाणेदारांना होती, परंतु अवैध धंदेवाल्यांचे कल्याण करण्याची शपथ खाणाऱ्या व पोलिसांच्या निकटवर्ती असणाऱ्या व्यक्तीचा हायवा सुसाट निघाला आणि थेट गेवराईचे ठाणेदार किशोर पवार यांना नियंत्रण कक्षापर्यंत घेऊन गेला.
मात्र आता पुढे काय? यावर काल दिवसभर मंथन करणाऱ्यांचे कल्याण कसे होणार यावर चर्चा सुरू होती. गेवराई पोलीस ठाण्याची सूत्रे हाती आल्यापासून पोनि किशोर पवार यांनी काही कारवाया अपवाद वगळता शहरातील गुन्हेगारी व अवैध तस्करीला आवर घालण्याऐवजी अवैध धंदे करणाऱ्यांचे कल्याण करणाऱ्यांना जास्त प्राधान्य दिले असल्याची बाब अनेक वेळा समोर आली.
परंतु ठाणेदारांचा विश्वास असल्याकारणाने अनेकांचे कल्याण झाले. एवढेच नाही तर गोदापात्रात रात्रीच्या वेळी बेकायदेशीररित्या फिरण्याचे लायसन्स मिळाल्यानंतर एका प्रतिष्ठित पुढाऱ्याने वाळू माफियांचे कल्याण करणाऱ्याला सजड दम दिला, परंतु तो तरीही थांबला नाही. ‘मी आता यांच्यात नाही’ असा आव आणला व ठाण्याची सूत्रे पडद्यामागून चालवू लागला.
अशा अवैध धंदेवाल्यांचे कल्याण करणाऱ्यापासून नूतन ठाणेदार बुद्धिराज सुकाळे यांनी दोन हात लांब राहायलाच हवे, अशी चर्चा गेवराईच्या काही ठरावीक पोलीस कर्मचाऱ्यांमध्ये असून, कर्तव्यदक्ष पोलीस अधीक्षक नवनित काँवत यांनी देखील ‘कल्याण’ची खोड मोडण्याची गरज आहे, तेव्हाच गेवराई पोलीस ठाण्याच्या हद्दीत कायदा व सुव्यवस्था नांदेल, यात मात्र दुमत नाही.
