मा आ.अमरसिंह पंडित यांच्या हस्ते कापूस वेचणी मशिनचे शेतकऱ्यांना वाटप
गेवराई, दि.30 (वार्ताहार)भारतीय कपास निगम लिमिटेड, छत्रपती संभाजीनगर विभागाच्या वतीने कृषी उत्पन्न बाजार समिती, गेवराईच्या कार्यक्षेत्रातील कापूस उत्पादक शेतकऱ्यांना कापूस वेचणी मशीनचे वितरण करण्यात आले. माजी आमदार अमरसिंह पंडित यांच्या हस्ते मन्यारवाडी येथील शेतकरी कडाजी निकम आणि वडगाव ढोक येथील शेतकरी छोटुराम ढाकणे यांना या मशीनचे वाटप करण्यात आले.
कृषी उत्पन्न बाजार समितीच्या अमृता सभागृहात आयोजित या कार्यक्रमास भारतीय कपास निगमचे छत्रपती संभाजीनगर विभागाचे महाव्यवस्थापक अर्जुन दवे आणि उप महाव्यवस्थापक रोहित शर्मा यांची प्रमुख उपस्थिती होती.
कापूस वेचणीसाठी लागणारा वेळ आणि मजुरांची उपलब्धता ही शेतकऱ्यांसमोरील महत्त्वाची समस्या आहे. अशा परिस्थितीत कापूस वेचणी मशीनमुळे शेतकऱ्यांना वेचणीच्या कामात मोठी सुविधा मिळणार असून वेळ आणि श्रमाची बचत होण्यास मदत होणार आहे. आधुनिक तंत्रज्ञानाचा वापर शेतीमध्ये वाढवून शेती अधिक सुलभ आणि फायदेशीर करण्याच्या दृष्टीने भारतीय कपास निगमचा हा उपक्रम महत्त्वपूर्ण ठरणार आहे.
या प्रसंगी भारतीय कपास निगमचे गेवराई केंद्रप्रमुख नितीन पाटील भरणे, धारूर केंद्रप्रमुख चव्हाण, माऊली कोटेक्सचे बंडूशेठ मोटे, गिरीराज कॉटनचे नागेश मानूरकर, काश्यफ ऑईलचे जमिल शेख, राम सोळुंके, कृषी उत्पन्न बाजार समितीचे सचिव शिवाजी हक्कदार यांच्यासह बाजार समितीचे अधिकारी व कर्मचारी उपस्थित होते.
