सामान्यांचे प्रश्‍न पोटतिडकीने सोडविण्याचे काम अमरसिंहांनी केले – आ. अशोक पवार

शारदा प्रतिष्ठानच्या शिबीरात दिव्यांगांना मोफत कृत्रिम अवयवांचे वाटप

गेवराई दि. २८ ( वार्ताहार ) – अमरसिंह पंडित यांनी माणुसकीचा धर्म सांभाळत दिव्यांगांना मोठा आधार दिला आहे. शारदा प्रतिष्ठानच्या माध्यमातून त्यांनी विविध समाजपयोगी उपक्रम राबवुन समाजहित जोपासले आहे. सर्वसामान्यांचे प्रश्‍न पोटतिडकीने सोडविण्याचे काम अमरसिंह पंडित यांनी केले असे प्रतिपादन आ. अशोक पवार यांनी केले. शारदा प्रतिष्ठानच्या वतीने आयोजित केलेल्या मोफत कृत्रिम अवयव वाटपाच्या कार्यक्रमात ते बोलत होते. यावेळी २७१ दिव्यांगांना मोफत कृत्रिम हात व पायांचे वाटप करण्यात आले. व्यासपिठावर अमरसिंह पंडित, राष्ट्रवादीचे जिल्हाध्यक्ष अ‍ॅड. राजेश्‍वर चव्हाण, विजयसिंह पंडित यांच्यासह मान्यवर उपस्थित होते.

विधानसभेचे विरोधी पक्षनेते तथा राज्याचे माजी उपमुख्यमंत्री अजितदादा पवार यांच्या वाढदिवसानिमित्त शारदा प्रतिष्ठान, गेवराई आणि साधू वासवाणी मिशन, पुणे यांच्या संंयुक्त विद्यमाने रविवार दि. २८ ऑगस्ट रोजी पात्र लाभार्थ्यांना अद्यावत तंत्रज्ञानाने तयार केलेले अत्यंत हलके व मजबुत फायबर पासुन निर्मित मोफत कृत्रिम हात व पाय या अवयवांचे मान्यवरांच्या शुभहस्ते वाटप करण्यात आले. कार्यक्रमालाा पुणे जिल्ह्यातील शिरुर-हवेली मतदार संघाचे आ. अशोक पवार, प्रतिष्ठानचे कार्यवाह अमरसिंह पंडित, राष्ट्रवादीचे बीड जिल्हाध्यक्ष अ‍ॅड. राजेश्‍वर चव्हाण, माजी जि.प.अध्यक्ष विजयसिंह पंडित, भवानी बँकेचे चेअरमन बप्पासाहेब मोटे, जि.प. सभापती बाबुराव जाधव, बाजार समितीचे सभापती जगन पाटील काळे, जयभवानीचे व्हा. चेअरमन जगन्नाथ शिंदे, साधु वासवाणी मिशनचे मिलींद जाधव, सुशिल ढगे, जि.प. सदस्य फुलचंद बोरकर, माजी सभापती पाटीलबा मस्के, किशोर कांडेकर, जालिंदर पिसाळ, सरवर पठाण आदी मान्यवर व्यासपिठावर उपस्थित होते. प्रातिनिधिक स्वरुपात अर्जुन जाधव यांना कृत्रिम पायाचे वितरण करण्यात आले. कार्यक्रमात फय्याज पठाण या लाभार्थी दिव्यांगाने मनोगत व्यक्त करुन अमरसिंह पंडित यांचे आभार व्यक्त केले.

शारदा प्रतिष्ठानच्या माध्यमातुन आजवर अनेक सामाजिक उपक्रम राबविले, आजच्या शिबीरामुळे दिव्यांगांना न्याय देण्याचा संकल्प पुर्ण झाल्याचे समाधान मिळाले. साधु वासवाणी मिशनच्या माध्यमातुन भविष्यातही असेच उपक्रम राबविले जातील अशी ग्वाही अमरसिंह पंडित यांनी आपल्या प्रास्ताविक भाषणात दिली. अजित पवारांना शुभेच्छा देतांना वेळोवेळी पवारांकडुन होत असलेल्या मदतीचा उल्लेख करुन सामाजिक जाणिवा जपणार्‍या नेत्यांचा वाढदिवस अशा उपक्रमांनी होत असल्याचे समाधान व्यक्त केले.

अमरसिंह पंडित एक दिलदार व्यक्तीमत्व असुन गोर-गरिबांच्या वेदनेवर त्यांनी कायम फुंकर घालण्याचे काम केले आहे. गरजु दिव्यांगांना कृत्रिम अवयव वाटप करुन खर्‍या अर्थाने त्यांना स्वता:च्या पायावर सन्मानाने उभे करण्याचे काम केले असल्याचे प्रतिपादन अ‍ॅड. राजेश्‍वर चव्हाण यांनी केले.

आ. अशोक पवार यांनी आपल्या भाषणात शारदा प्रतिष्ठानच्या सामाजिक उपक्रमांचे कौतुक केले, लोकोपयोगी कार्यक्रम राबवुन लोकांना मदत करण्याचे काम अमरसिंह पंडित करत असुन त्यांना माजीमंत्री शिवाजीराव पंडित यांच्याकडुन ही शिकवण मिळाल्याचे सांगितले. सामान्यांच्या प्रश्‍नांसाठी त्यांनी अनेक वेळा आमदार म्हणुन सभागृहात संघर्ष केल्याचे सांगुन अमरसिंह पंडित यांच्या सोबत आपण काम केल्याची आठवण त्यांनी भाषणात करुन दिली. लाखो रुपये किंमतीचे कृत्रिम अवयव गरजु दिव्यांगांना वाटप करण्यासाठी शारदा प्रतिष्ठानच्या माध्यमातुन करण्यात आलेले प्रयत्न स्तुत्य आहेत. दिव्यांगांना आधार देण्याचे पुण्यकर्म या निमित्ताने अमरसिंह पंडित यांनी केल्याचे सांगुन त्यांनी अजित पवार यांना वाढदिवसाच्या निमित्ताने शुभेच्छा दिल्या.

शिबीरात साधु वासवाणी मिशनच्या तज्ञांकडुन गरजुंना कृत्रिम अवयव प्रत्यक्ष बसवुन देण्यात आले. अनेकांना आधारासाठी कुबड्या, वॉकर आणि काठ्यांचे वाटप करण्यात आले. नविन कृत्रिम अवयव मिळाल्याचा आनंद दिव्यांगांच्या चेहर्‍यावर दिसुन येत होता. लाभार्थ्यांनी शारदा प्रतिष्ठान आणि अमरसिंह पंडित यांचे आभार व्यक्त केले.