जूगार अड्यावर धाड;सोळाजण ताब्यात

स्थानिक गुन्हे शाखेची कार्यवाई

                      बीड  दि 10 ( वार्ताहार )
अवैध धंद्यांविरुध्द गुन्हे शाखेने मोहीम उघडली असून, तलवाडा हद्दीतील भेंडटाकळी तर पाटोदा तालुक्यातील पाटसरा येथे जुगार अड्यांवर धाडी टाकून १६ जणांना अटक करण्यात आली. यावेळी १२ लाख रुपयांचा मुद्देमाल जप्त केला.

सविस्तर माहिती अशी की भेंडटाकळी येथील शिवाजी विठ्ठल उबाळे हे स्वत:च्या मालकीच्या पत्र्याच्या शेडमध्ये जुगारअड्डा चालवित असल्याची माहिती मिळाल्यावरूण स्थानिक गुन्हे शाखेचे पोलिस निरीक्षक सतीश वाघ यांच्या मार्गदर्शनाखाली उपनिरीक्षक संतोष जोंधळे व सहकाऱ्यांनी याठकाणी छापा टाकला. यावेळी शिवाजी उबाळेसह गणेश चव्हाण (रा. गोपतपिंपळगाव), हनुमान सोळंके (रा. सुर्डी), बाळू राठोड (रा. मारफळा), जिजा तौर (रा. बाबुलतारा), राम संधीपान कदम (रा. सिरसदेवी), सारंग कादे (रा. खेर्डावाडी), अर्जुन उबाळे (रा. भेंडटाकळी), चरणदास काळे (रा.उमरद पारगाव ता.बीड) या

९ जणांना रंगेहाथ पकडण्यात आले. त्यांच्याकडून रोख रक्कम, जुगार साहित्य व एक जीप असा १२ लाख १० हजार ४०० रुपयांचा मुद्देमाल जप्त करण्यात आला. याप्रकरणी उपनिरीक्षक संतोष जोंधळे यांच्या तक्रारीवरून तलवाडा ठाण्यात गुन्हा नोंद झाला. दरम्यान, दुसरी कारवाई अंमळनेर ठाणे हद्दीतील पाटसरा येथे सहायक निरीक्षक ज्ञानेश्वर कुकलारे व सहकाऱ्यांनी केली. यावेळी ७ जणांना रंगेहाथ पकडून ६ हजार ४० रुपयांचा मुद्देमाल जप्त केला पुढील तपास तलवाडा पोलीस ठाण्याचे उपनिरीक्षक बाबासाहेब भवर हे या प्रकरणाचा पुढील तपास करीत आहेत.